Matasa Sun Kona Shelkwatar ‘Yan Sanda Da Wani Dan Bindiga

0
119

Matasa Sun Kona Shelkwatar ‘Yan Sanda Da Wani Dan Bindiga

Lamarin rashin tsaro a Arewacin Nijeriya na ci gaba da daukar sabon salo, inda jama’a ke nuna bukatar daukarwa kan su hukunci.

Irin hakan ya faru a jihar Sakkwato dake Arewacin kasar inda matasa suka fusata suka kona ofishin ‘yan sanda da wani da ake tuhumar dan bindiga ne, saboda an hana su daukar doka a hannun su.

Da safiyar ranar talata ne wasu da ake tuhumar ‘yan bindiga ne suka shiga wani kauye mai suna Kainuwa su ka yi fashi gidan wani Alhaji, inda bayan solar wuce jama’ar garin suka bi sawunsu, suka tarar da wasu mutane 6 suka kama su a kan tuhumar su ne barayin.

Daga nan suka mika su ga hannun jami’an ‘yan sanda domin daukar matakin da ya dace.

Rundunar ‘yan sanda ta jihar ta bakin kakakin ta ASP Sanusi Abubakar ta ce bayan da DPO ya karbi mutanen sai jama’ar suka nuna bukatar a basu su su kashe.

Wannan na zuwa ne lokacin da wasu al’ummomi ke ta fuskantar hare-haren ‘yan ta’adda musamman a gabashin Sakkwato duk da watan azumi da ake ciki.

Bisa ga yadda jama’a ke kokawa akan ayukkan ta’addanci da ke salwantar da rayukan da dukiyoyi, rashin samar da hanyoyin magance wannan matsalar kan iya haifar da wasu matsaloli a nan gaba kamar yadda alamu suka nuna na jama’a na son a bari su kashe yan ta’adda da kan su.

What's On Your Mind?