Masar Za Ta Samar Da Riga-kafin COVID-19 Na Kamfanin Sinovac A Watan Yuni

- Advertisement -

Masar Za Ta Samar Da Riga-kafin COVID-19 Na Kamfanin Sinovac A Watan Yuni

Daga  CRI Hausa

Ministar lafiyar kasar Masar Hala Zayed, ta sanar cewa, Masar za ta fara aikin samar da riga-kafin COVID-19 na kamfanin Sinovac a cikin gidan kasar a watan Yuni.

Da take jawabi a taron manema labarai a birnin Alkahira, ministar ta ce za a samar da kashin karfo na riga-kafin miliyan 2 a watan Yuni a kamfanin sarrafa kwayoyin halittu da aikin riga-kafi na kasar Masar wato (VACSERA).

Zayed ta fadawa ’yan jaridu cewa, kamfanin zai samu dukkan kayayyakin hada riga-kafin da ake bukata ya zuwa ranar 18 ga watan nan na Mayu, ta kara da cewa, za a samar da riga-kafin miliyan 40 a shekarar farko.

Zayed ta ce, an kulla yarjejeniyoyi guda biyu tsakanin kamfanin Sinovac da VACSERA a watan Afrilu, yarjejeniyar farko ta baiwa bangaren kasar Masar damar samun kwararru masana da za su taimakawa aikin samar da riga-kafin, sannan yarjejeniya ta biyu ta baiwa kamfanin VACSERA damar samun lasisin samar da riga-kafin.

Ministar ta ce, riga-kafin da kamfanin na Sinovac zai samar a kasar Masar za a dinga kiransa da sunan Sinovac-Vacsera. (Ahmad Fagam)

- Advertisement -